Zëvendëskryeministri i Kosovës, Enver Hoxhaj ka pritur në takim delegacionin gjerman të kryesuar nga këshilltari kryesor i kancelares së Gjermanisë, për politikë të jashtme, Jan Hecker.
Përmes një postimi në profilin e tij zyrtar në rrjetin social Facebook, Hoxhaj tha se e ka informuar Hecker për zhvillimet e fundit në Kosovë dhe hapat që janë ndërmarrë nga ana e Kosovës për vazhdimin e dialogut, shkruan lajmi.net.
Hoxhaj tha se viti 2019, paraqet momentum shumë të favorshëm për arritjen e një marrëveshjeje historike, e cila tha se duhet të përfundojë me njohje të ndërsjellë dhe anëtarësim të Kosovës në OKB.
Ai theksoi se roli dhe mbështetja e Gjermanisë, sikurse edhe e aleatëve të tjerë të Kosovës në procesin e dialogut është jashtëzakonisht e rëndësishme.
“Diskutim i frytshëm me këshilltarin kryesor të kancelares gjermane Merkel për politikë të jashtme, Jan Hecker. E informova për zhvillimet e fundit në Kosovë dhe hapat që kemi ndërmarrë në funksion të vazhdimit të dialogut me Serbinë. Roli dhe mbështetja e Gjermanisë dhe e aleatëve të tjerë të Kosovës në procesin e dialogut është jashtëzakonisht e rëndësishme. Viti 2019 paraqet momentum shumë të favorshëm për arritjen e një marrëveshjeje historike, e cila duhet të përfundojë me njohje të ndërsjellë dhe anëtarësim të Kosovës në OKB”, ka shkruar Hoxhaj në Facebook.
