Haradinaj thotë se përkrah mbylljen e kazinove

E publikuar: 22/03/2019 09:35
Rreshtat+- AShkronjat+- Printo

Deputetët e Kuvendit të Kosovës, kanë thirrur seancë të jashtëzakonshme për sot në orën 11:00, me kërkesë që Kuvendi të miratojë rezolutë lidhur me pezullimin e aktivitetit të kazinove dhe lojërave të fatit, si dhe plotësim-ndryshimin e ligjit ekzistues, raporton Koha.net.

Mëngjesin e sotëm, kryeministri i Kosovës Ramush Haradinaj, ka përkrahur këtë seancë të thirrur.

“Përshëndes propozim rezolutën e 49 deputetëve të Kuvendit të Republikës së Kosovës, lidhur me pezullimin e aktiviteteve të kazinove dhe lojërave të fatit dhe plotësim ndryshimin e ligjit përkatës”, ka shkruar Haradinaj në Facebook.

Thotë madje se ekzekutivi e organet e drejtësisë, janë mobilizuar për të reaguar dhe për të parandaluar këto degradime nëpër lokale bastesh.

“Ditë më parë, si Kryeministër i vendit kam kërkuar inicimin e procedurave të nevojshme brenda ekzekutivit, të cilat do të rezultonin me mbylljen dhe pezullimin e aktiviteteve të kazinove dhe lojërave të fatit. Përballë kësaj gjendjeje, ne nuk do të lejojmë që këto vende të jenë arenë e krimit dhe të marrin jetë njerëzish. Ekzekutivi dhe organet e sigurisë, tashmë janë mobilizuar për të reaguar dhe parandaluar degradimin e mëtejmë”, përfundon Haradinaj.

Sot seanca e jashtëzakonshme për kazinotë dhe lojërat e fatit

Kujtojmë se seanca e jashtëzakonshme për kazinotë do të mbahet pas dy vrasjeve që ndodhën brenda pak ditësh në kazinotë në Suharekë dhe Lipjan.

Koha Ditore pati raportuar Kosova me 289 lokale bastesh e me 1.463 automate bixhozi.

Burime të Kohës Ditore, patën thënë se synohet trefishimi i bizneseve të bixhozit.