Kandidati për kryeministër të Kosovës nga radhët e koalicionit, PDK-AAK, Nisma, Ramush Haradinaj, i ka siguruar qytetarët e Kosovës se me të si kryeministër i vendit, qytetarët do të mund të udhëtojnë pa viza brenda 90 ditësh në Gjermani, Zvicër, Austri dhe gjithë Evropën.
Haradinaj nëpërmjet një video-mesazhi ka thënë se brenda 3 muajve Qeveria e Kosovës në krye me të do ta mundësojë liberalizimin e vizave.
Ndërkaq, zgjedhjet e përgjithshme parlamentare do të mbahen në Kosovë më 11 qershor. Për 120 ulëset në Kuvendin e Kosovës, pritet të garojnë 5 koalicione, 19 parti politike dhe 2 iniciativa qytetare.
Postimi i plotë i Haradinajt në Facebook:
Të nderuar qytetarë të Republikës!
Jemi vetëm një ditë para fillimit zyrtar të fushatës zgjedhore. Në takimet e shumta anëekënd Kosovës e kam thënë se brenda 3 muajsh Qeveria jonë do ta mundësoj Liberalizimin e Vizave.
Edhe sot e përsëriti këtë Zotim: Me Qeverinë e re brenda 90 ditësh qytarët e Kosovës do të udhëtojnë pa viza në Gjermani, Zvicër, Austri dhe krejt Evropën.
Ka ardhë #KohapërFillimineRi! Ka ardhë Koha për rrugën evropiane të Kosovës! Pa Viza!
RH