Grenell pas takimit me Kurtin: Mungesa e marrëveshjes Kosovë- Serbi, pengesë e investimeve të huaja

E publikuar: 09/10/2019 17:11
Rreshtat+- AShkronjat+- Printo

Në Ambasadën e re të SHBA-ve në Prishtinë, kryetari i Lëvizjes Vetëvendosje, Albin Kurti, dhe anëtari i kryesisë, Glauk Konjufca, u takuan me të dërguarin e presidentit amerikan, Donald Trump, Richard Grenell dhe ambasadorin amerikan në Kosovë, Philip S. Kosnett.

Në një komunikatë për media, Lëvizja Vetëvendosje bënë të ditur se në këtë takim, Grenell theksoi që mungesa e marrëveshjes së Kosovës me Serbinë është pengesa kryesore e investimeve të huaja në ekonominë kosovare.

Lideri i Lëvizjes Vetëvendosje, Albin Kurti, shprehu gatishmërinë e tij që si kryeministër i ri i Kosovës të thellojë bashkëpunimin me SHBA-të.

Tutje thuhet se Grenell dhe Kurti janë pajtuar që Kosova ka nevojë për zhvillim ekonomik dhe investime prej jashtë, por për këtë gjë problem janë sidomos korrupsioni i lartë në qeveri që krijon pasiguri e cila tremb bizneset, varfëria e përhapur në popullsi që e mban të ulët kërkesën agregate si dhe qasja e vështirë në financa për bizneset për shkak të kamatave të larta të kredive në banka.

Sa i përket dialogut me Serbinë, bëhet e ditur se Kurti ka thënë që përmbajtja dhe procesi i marrëveshjes janë më të rëndësishme për qëndrueshmërinë e saj sesa afati kohor për të.