Këshilli Gjyqësor dhe Këshilli Prokurorial do të ftohen për raportim në komisionin për të Drejtat e Njeriut, Barazi Gjinore, për Persona të Pagjetur dhe Peticione, për të raportuar për rastin e të miturës që u keqpërdor nga mësimdhënësi dhe një zyrtar policor në Drenas.
Kështu kanë vendosur deputetët në mbledhjen që është mbajtur sot. Po ashtu, kanë bërë të ditur se do të marrin pjesë në protestën që do të mbahet sot në orën 12:00.
Kryetarja e këtij komisioni Duda Balje, ka thënë se si komision duhet të bëjnë diçka që rastet e tilla të mos ndodhin.
“A kemi fuqi, a kemi mundësi të bëjmë diçka? Tash është topi tek drejtësia. Duhet të bëjmë diçka më serioze edhe ne si përfaqësues të popullit, të bëjmë ndonjë fushatë”, u shpreh ajo, raporton Ksp.
Deputeti Shemsi Syla, ka përmendur disa nga veprimet që si komision do të duhej t’i marrin.
“Ne së pari duhet të thërrasim në raportim ministrin e Arsimit, atë të Punëve të Brendshme dhe të Shëndetësisë dhe të raportohet. Mandej të kontaktohet Avokati i Popullit që të merret në shqyrtim. Të kërkohet rifillimi i rastit të mësimdhënësit, çfarë ndodhi. Të kërkohet trajtimi i lejes së punës për gjinekologun. Të kërkohet veting në prokurori dhe në polici. Të kërkohet dhe të bëhet thirrje ndaj të gjithë atyre që kanë përjetuar dhunë dhe të denoncojnë”, tha ai.
Deputetja Teuta Haxhiu, ka pyetur se pas këtij rasti, kush janë institucionet e besueshme që një person mund të raportojë diçka.
“Kush janë institucionet e besueshme që dikush mund t’i drejtohet kur ka shantazhe, kush është institucioni i besueshëm për t’u drejtuar për shantazhet, sepse shantazhet e kanë sjell deri këtu. Mësuesi ku ka shkuar ajo të marrë dije, pas mësuesit ka shkuar tek siguria. Çka duhet të bëhet më shumë? Në fund të fundit, tek mjeku i cili ka kryer një krim. Cili do të jetë vendi i besueshëm që vajzat apo kushdo që ka dhunë, ku mund të drejtohet? Unë nuk kam një përgjigje. Gjykatat të veprojnë me shpejtësi. Pse është kthyer në shkollë mësuesi? Të mësohemi një herë e përgjithmonë që një person që bën vepër të tillë ta harrojë uniformën”, tha ajo.
Deputetja e PDK-së, Luljeta Veselaj-Gutaj, e quajti akt makabër.
“Me njerëz monstrum që punojnë në pozita të larta. Në shkolla dërgojmë fëmijët për mësim dhe aty ndodh abuzimi, pastaj në polici thellohet abuzimi, keqtrajtohet edhe më tutje duke përfunduar tek mjekësia. Për mua është shumë shqetësuese. Ky akt makabër dhe të gjithë ata pjesëmarrës të marrin dënimin e merituar”, tha ajo.
Ajo ka thënë se është shqetësuese që në shkolla nuk ka psikologë që vajza të kishte pasur mundësi që ta tregonte problemin që kishte.
Ndërsa deputetja e LDK-së, Lirije Kajtazi, tha se personave që kanë keqpërdorur detyrën si dhe vajzën të ju shqiptohet dënim i ashpër.
“Dënim i ashpër në mënyrë që të mos i jepet kohë që ata të falin edhe njëherë të fortë dhe të ushtrojnë dhunë të njëjtë. Ka edhe shumë raste të tjera”, tha ajo.
