Kundërshtari i Prishtinës, SC Fola Esch, ka arritur të sigurojë pjesëmarrjen në Europa League nëpërmjet vendit të tretë në klasifikimin e kampionatit shtetëror të Luksemburgut, nga 14 skuadra sa ka në ‘National Division’.
Me 47 pikë, me goldallim +31, 72:41, ka qenë prapa kampionëve të shtetit, Dudelange, me 68 pikë dhe nënkampionit Niedercorn me 63 pikë.
Fola Esch është skuadra e pestë më e suksesshme me shtatë tituj, por dy prej tyre i ka fituar viteve të fundit si më 2013 dhe 2015 – tituj të vetëm që nuk i ka marrë kampioni i sivjetmë, Dudelange – skuadër kjo e cila nga viti 2000 i ka fituar plotë 14 tituj e ku mbetët mbrapa Jeunesse me 28, rekord të shtetit.
CS Fola Esch, para vitit 2011 kishte vetëm një pjesëmarrje në Kupë të Kupave duke u eliminuar rëndë në dy ndeshje nga Beroe e Bullgarisë 1-11, shkruan në faqen zyrtare të FC Prishtinës.
Vitin e kaluar kishte kaluar dy raunde e ku më parë kishte regjistruar tri barazime në eliminimet kundër Elfsborg e Goteborg të Suedisë, si dhe Dinamos së Zagrebit. E kishte mposhtur edhe Aberdeedin skocez 1-0, por ishte eliminuar në ndeshjen kthyese.
Edicionin e kaluar arriti kulmin kur në UEL mposhti Milsamin e Moldavisë 2-1/1-1 dhe Inter Bakun e Azerbajxhanit 4-1/0-1 ku më pas u eliminua nga befasia e Ligës së Evropës, Ostersund 1-2/0-1.
Skuadra e CS Fola Esch vlerësohet me 2.3 milion euro nga Transfermarkt. Në radhët e saj ka futbollistë me shumë përvojë që kanë qenë pjesë e skuadrave të kampionateve franceze e gjermane.
CS Fola luan në stadiumin e vet prej më shumë se 3.000 vendesh, Emile Mayrisch, të shtrirë në jug të Eschit.
Fanellat tradicionale janë kuq e bardhë. Trajner është gjermani 34-vjeçar, Thomas Klasen, ish-futbollist i Eintracht Trier, Koblenzit etj, ndërsa si kryetrajner është vetëm puna e parë që e ka filluar më 5 shkurt të këtij viti.
Luksemburgu është ndër shtetet më të vogla në Evropë me 2.586 km2 dhe me 600.000 banorë, i rrethuar në veriperëndim nga Belgjika, nga verilindja nga Gjermania dhe nga jugu nga Franca.
Luksemburgu është monarki parlamentare dhe pjesë e BE-së, ndërsa përbëhet nga disa popuj me shumicë të asaj vendasve luksemburgase prej 51 për qind, pastaj nga emigrantët portugezë 18 për qind, si dhe francezët me 13 për qind e gjermanët me 10 për qind, por edhe mbi 7 për qind nacionalitete tjera.
Gjuhë zyrtare është luksemburgishtja, frëngjishtja dhe gjermanishtja. Kryeqyteti quhet njëjtë sikurse shteti, Luksemburg dhe është qyteti më i madh në këtë shtet, me 76.000 banorë i ndjekur me qytetin e klubit me të cilin ndeshet Prishtina, Esch-sur-Alzette me 28.000 banorë.
Në sportin e futbollit janë pothuajse të panjohur, por viteve të fundit vërehet rritje në futbollin ekipor të këtij vendi në garat evropiane. Të renditur në vendin e 48-të me 4.375 pikë në koeficient, shteti më i vogël i Beneluksit ka katër skuadra në garat evropiane.
