Çfarë ndodhë nëse Kosova nuk ia heq taksën Serbisë

E publikuar: 10/01/2019 12:49
Rreshtat+- AShkronjat+- Printo

Nëse Prishtina zyrtare do të vazhdojë të mbajë taksën 100 për qind ndaj mallrave serbe, atëherë Serbinë e pret një ndërprerje totale e dërgimit të mallrave serbe në Kosovë.

Kështu tha ekonomisti Stojan Stamenkoviq gjatë prezantimit të revistës Analizat Makroekonomike dhe Trendet (MAT).

Sipas tij, shifra prej 409 milionë euro e mallrave të shitura nga Serbia në Kosovë është e saktë dhe e mundur, pavarësisht se bëhet fjalë për një treg relativisht të vogël, transmeton KosovaPress.

“Pritjet në lidhje me zgjerimin e investimeve në vendet e tjera janë të mira, por mund të jetë shumë e dyshimtë. Ekspertët e Bankës Botërore dhe FMN-së konsiderojnë se mund të vijë deri te recesionet tendencioze,” tha Stamenkoviq, një nga autorët e revistës MAT.

Ndryshe, pala serbe kërkon heqjen e taksës si kushte për vazhdimin e dialogut në Bruksel.

Një kërkesë të ngjashme palës kosovare në takimin e fundit në Bruksel ia ka përcjellë edhe kryediplomatja evropiane Federica Mogherini.

Kryeministri Ramush Haradinaj ka bërë të qartë se Kosova mund të heqë taksën e vendosur vitin e kaluar ndaj mallrave serbe, nëse Serbia do të njehë shtetin e pavarur dhe sovran të Kosovës.