Ish-presidenti George W. Bush përgëzoi presidentin e zgjedhur Joe Biden në një telefonatë të dielën dhe tha se, ndërsa Donald Trump ka të drejtë të ndjekë sfidat ligjore dhe rinumërimet, gara e vitit 2020 ishte e drejtë dhe rezultati i saj është i qartë.
Gjesti nga Bush, i vetmi ish-president i gjallë republikan, ishte një shkëputje nga presidenti i partisë së tij në largim, Trump, i cili deri më tani ka refuzuar të pranojë humbjen.
Në deklaratë, Bush tha se ai kishte telefonuar sot Biden dhe zëvendës presidentin e zgjedhur Kamala Harris.
“Megjithëse kemi dallime politike, unë e njoh Joe Biden si njeri i mirë, i cili ka fituar mundësinë e tij për të udhëhequr dhe bashkuar vendin tonë,” tha Bush.
Bush në vitin 2000 u zgjodh me një diferencë shumë më të vogël se Biden, me garën e tij kundër zëvendës presidentit të atëhershëm demokrat Al Gore duke zbritur në 537 vota në Florida dhe një vendim të Gjykatës së Lartë në Dhjetor. Ai tha se Trump ka të drejtë të kërkojë rinumërime dhe të ndjekë sfida ligjore, por tha se fitorja e Biden ishte e qartë.
“Populli amerikan mund të ketë besim se këto zgjedhje ishin thelbësisht të drejta, integriteti i saj do të përkrahet dhe rezultati i tij është i qartë,” tha Bush, i cili ka qëndruar kryesisht jashtë politikës që kur u largua nga detyra në janar 2009, transmeton CNN.
Ndryshe, Trump ka refuzuar të pranojë humbjen, duke postuar në Twitter një mori pretendimesh rreth mashtrimit të votuesve pa ofruar ndonjë provë dhe duke këmbëngulur se ai kishte fituar zgjedhjet. Avokatët e tij kanë ngritur padi në disa shtete, deri më tani pa ndonjë sukses.
