Lulzim Basha akuzoi Edi Ramën se e përdor reformën në drejtësi vetëm si mjet pazaresh, shantazhi dhe imazhi. Për Bashën, këtë e vërteton propozimi i sotëm i tij për të gjetur një kompromis për shtyrjen e vetting-ut.
Nëpërmjet një statusi në Facebook, kreu i PD-së kujton se opozita e votoi vetting-un në korrik dhe premton se vetting-u do të çohet deri në fund, por jo me Edi Ramën. Sipas Bashës, ndryshe nga Rama, opozita do një vetting të vërtetë, të pakapur nga politika dhe të paanshëm.
Postimi i plotë:
Sot Kryeministri në ikje na propozoi të gjejmë një kompromis me shtyrjen e vetingut. Kjo është një tjetër dëshmi se për Edi Ramën drejtësia dhe reforma në drejtësi kanë qenë dhe mbeten vetëm një mjet pazaresh, shantazhi dhe imazhi. Kurse për ne drejtësia është themeli që garanton lirinë dhe demokracinë, mbi të cilin do të ngrihet shteti modern shqiptar.
Ne jemi për vetingun, më 21 korrik votuam vetingun dhe do ta çojmë deri në fund vetingun. Ne kemi refuzuar vetingun e Edi Ramës sepse duam një veting të vërtetë, të pakapur nga politika dhe të paanshëm. Menjëherë pas formimit të qeverisë që do të garantojë zgjedhjet e lira dhe të ndershme, ne jemi të gatshëm të votojmë ligjin për zbatimin e vetingut sipas frymës dhe përcaktimeve kushtetuese të 22 korrikut.
Krimi qeveritar do të përballet me drejtësinë e pavarur, ata që e kthyen Shqipërinë në republikë të drogës dhe korrupsionit do të përballen me drejtësinë e vërtetë.
Mbi të gjitha, zgjedhjet e lira do të hapin rrugën për ndërtimin e shtetit të së drejtës dhe një demokracie perëndimore në Shqipëri. Liria, drejtësia dhe kontrolli mbi pushtetin do të jenë themeli i Republikës së Re.#NgrihemiBashke #ZgjedhjeTeLira #RepublikaeRe
