Barcelona humb nga Levante, kualifikimin e kërkon pas një jave në Nou Camp

E publikuar: 10/01/2019 23:30
Rreshtat+- AShkronjat+- Printo

Barcelona ka pësuar humbje në ndeshjen e parë të Kupës së Mbretit në udhëtim te Levante 2-1.

Vendasit e nisën për mrekulli ndeshjen, pasi vetëm pas katër minutave lojë arritën të kalonin në epërsi.

Rochina harkoi bukur në zonë nga ndërprerja, ndërsa edhe më bukur u gjend qendërmbrojtësi Cabaco që shënoi me kokë për 1-0.

Kur pritej që Barcelona të kundërpërgjigjej dhe të barazonte rezultatin, ndodhi e kundërta.

Ishin futbollistët vendas që arritën përsëri të shënonin në portën e Jasper Cillessen.

(Foto: David Ramos/Getty Images/Guliver)

Emanuel Boateng shërbeu bukur sulmuesin Borja Mayoral i cili shënoi për 2-0.

Barcelona tentoi në pjesën e parë të shënonte me Malcom e Dembele por një gjëje të tillë nuk ia arritën.

Me epërsinë 2-0 në të mirë të vendasve përfunduan 45 minutat e para të ndeshjes.

Në pjesën e dytë, Barcelona vazhdoi duke sulmuar për të gjetur golin, ku pati raste të mira me Dembelen e Coutinhon, por përsëri pa sukses.

(Foto: David Ramos/Getty Images/Guliver)

E në minutën e 85-të, lideri aktual i La Ligas arriti të ngushtojë rezultatin me anë të Philippe Coutinhos që shënoi nga penalltia për 2-1.

Për Levanten kjo ishte një fitore e madhe përballë Barcelonës në ndeshjen e parë të Kupës së Mbretit.

Ndeshja e kthimit do të zhvillohet pas një jave ku Barcelona në Camp Nou do të tentojë të shënojë fitore me dy gola epërsi për të kaluar në çerekfinale. /Telegrafi/