Google prezantoi ditën e sotme një aplikacion të ri me të cilin mund të mësoni, kontrolloni dhe kurseni pakon e internetit mobil.

Datally gjurmon në kohë reale konsumin e të dhënave dhe ofron rekomandime të personalizuara për kursimin e tyre shoqëruar me njoftime sa herë që gjendeni pranë një pike aksesi Wi-Fi.

Në një postim në blog, Google tha se kishte testuar në muajt e fundit aplikacionin në Filipine dhe përdoruesit kishin arritur të kursenin deri në 30% të pakos së internetit.

Përdoruesit mund të analizojnë konsumin mbi baza ditore, javore dhe mujore. Kur aktivizoni “Data Saver” aplikacioni menjëherë bllokon konsumin e të dhënave në sfond si dhe gjurmon në kohë reale konsumin e secilit prej aplikacioneve.

Me një të shtypur butoni mund të bllokoni menjëherë çdo konsum të dhënash nga aplikacionet.

Datally vjen si pjesë e nismës së “Next Billion Uers” të Google, një iniciativë e fokusuar në krijimin e produkteve për vendet me akses të kufizuar në internet. Aplikacioni është i disponueshëm globalisht. /PCWorld Albanian

Shkarkoni Google Datally