Në stadiumin e Flamurtarit të Prishtinës, të premten, po bëhej një punë e vogël në tribuna. Një tribunë të vogël ku në të shkuarën qëndronin zyrtarët e skuadrës vendase dhe mysafire, po zhvendosej nga njëra anë e fushës në tjetrën. Largimin e “mini-tribunës VIP” e ka kushtëzuar Federata e Futbollit e Kosovës (FFK), meqë ndodhej përballë tribunës kryesore dhe afër bankave ku qëndronin lojtarët rezervistë dhe zyrtarët e ndeshjes, shkruan sot Koha Ditore.
Por ky nuk është kushtëzimi më i madh i FFK-së për Flamurtarin dhe klubet e tjera të Superligës. Pas dy vjetësh, secila skuadër e Superligës duhet të ketë stadium të kategorisë së dytë të paktën, ndryshe skuadrat nuk do të jenë në gjendje të luajnë në stadiumet e tyre. Vendimin e mori pak ditë më parë Komiteti Ekzekutiv i FFK-së.
Por, klubet qysh tash nuk i pranojnë kushtet e FFK-së, meqë thonë se nuk kanë se ku t’i gjejnë mjetet as për zhvillimin e ndeshjeve, e lëre më për ndërtim të stadiumeve me standarde të UEFA-s.
