Diplomati shqiptar thotë se ideja e korrigjimit të kufijve ka qenë gjithmonë tezë e Beogradit

E publikuar: 10/05/2019 19:06
Rreshtat+- AShkronjat+- Printo

Ish-ministri i Jashtëm i Shqipërisë, Besnik Mustafaj, ka thënë se ideja e korrigjimit të kufijve mes Kosovës e Serbisë është e parealizueshme.

Mustafaj, në “Express Intervistën” e KTV-së, ka thënë se korrigjimi i kufijve nuk është siç e paraqet Thaçi, që Kosova do të marrë territor e nuk do të japë.

Sipas tij, ndryshimi i kufijve ishte gjithmonë tezë e Beogradit të cilët kanë pretenduar të marrin veriun e Kosovës.

Mustafaj thotë se ideja e korrigjimit të kufijve i është paraqitur secilit politikanë mirëpo një të tillë e kanë marrë parasysh vetëm presidenti i Kosovës Hashim Thaçi dhe kryeministri i Shqipërisë, Edi Rama.

“Unë besoj që çdo njeri që ka qenë ministër i Jashtëm, ia kanë paraqitur këtë gjë, mirëpo askush nuk e ka përfillur. Ata kanë gjetur presidentin Hashim Thaçi për të ja paraqitur këtë ide, dhe Rama është i dyti i cili e ka marrë parasysh”, tha Mustafaj, raporton Koha.net.

Ai thotë se Edi Rama nuk e njeh fare historinë shqiptare dhe nuk ka ndjeshmëri dhe nuk e kupton interesin dhe territorin e kombit.

“Rama është kollaj të manipulohet”, ka përfunduar ai.