Bordi i Drejtorëve i Agjencisë Kosovare të Privatizimit miratoi listën e aseteve të propozuara për SHAL 55, e cila përmban 137 asete atraktive në tërë rajonin e Kosovës dhe planifikohet të shpallet me 25 mars 2020.
Siç njofton AKP, bordi po ashtu miratoi propozimet e autoriteteve përkatëse të likuidimit për aprovimin e Raporteve për shpërndarjen përfundimtare për kreditorët e NSH-ve:
1) NSH Dardania Pejë;
2) NSH Industria e Miellit dhe Bukës (IMB) Mitrovica e Jugut;
3) NSH Kluz Drenas;
4) NSH Agri Coop Ranillug; dhe
5) NSH Termosistem Rahovec (Shpërndarje përfundimtare e pjesshme).
Pas shqyrtimit Bordi miratoi propozimin e menaxhmentit për vendosjen në likuidim të pesë ndërmarrjeve shoqërore.
Në këtë takim Bordi i Drejtorëve miratoi edhe Planin e Punës së AKP-së për vitin 2020 të propozuar nga menaxhmenti.
Bordi shqyrtoi dhe miratoi amandamentimin e Rregullores për njësinë e negocimit direkt, ndërkaq raportet rekomanduese dhe përfundimtare të kësaj njësie janë miratuar pas shqyrtimit të secilit rast veç e veç nga Bordi i Drejtorëve./Infosot/